Ek en Celesté stop onlangs voor ‘n crèche in die armste van arm gebiede in Grabouw om ons Hemel-op-Aarde werkboeke af te lewer. Sy lig my in dat ons maar op die uitkyk moet wees, want die dele waar ons nou beweeg noem mens die “ghetto’s”. Om julle ‘n idee te gee, die crèche is ‘n “container” wat agter hierdie huis staangemaak is.

Ons het skaars uitgeklim, toe ‘n horde skoolkinders uit die rigting van die laerskool in die straat afgehardloop kom. Ek was vas oortuig daar is gróót fout. Miskien ‘n skietery by die skool of iets. Ons kyk uit vir plek om dekking te slaan. Niemand anders as ek en Celesté lyk egter windverskrik nie … Die ou dame wat hoof is by die crèche som ons gedagtes op en verduidelik vinnig: die kinders oefen atletiek!! My hart breek in duisend stukke…

Net daar besef ek: ons het so alles, maar tog bly ons kla en is ons dikwels so onvergenoegd. Ons het atletiekvelde met uitsigte oor Valsbaai en klaskamers met lugversorgers … hierdie kinders oefen atletiek in die strate en gaan skool in containers. Ek voel die knop in my keel toe ek oomblikke later hul ogies sien blink oor hul eie, eie Hemel-op-Aarde werkboeke.

Gebedsversoek: Bid asseblief vir ons vir wysheid vir elke tree vorentoe. Bid vir die klein mensies van ons land wat bitter swaar kry en vir seën vir ons projek, sodat dit nog baie, baie lewens sal aanraak.

Kom maak na die diens ‘n draai by ons in die tent.

Sunette Erasmus

Tyd van verootmoediging en gebed - 10 Maart 2018
Toe het Hy die vyf brode en die twee visse geneem, na die hemel opgekyk en die seën gevra. Daarna het Hy die brood gebreek en dit vir sy dissipels gegee om aan die mense voor te sit. Hy het ook die twee visse onder hulle almal verdeel. Al die mense het geëet en genoeg gekry. (Mark 6:41-42 – 1983 Vertaling)

Wanneer ons gaan kamp in die veld is dit ‘n groot beplanningstrategie – ‘n lys vir dit en ‘n lys vir dat. Die aankope word fyn beplan. Alles word noukeurig ingepak en dubbeld seker gemaak dat alles wel ingepak is.

Markus vertel van ‘n menigte mense wat Jesus gevolg het na ‘n afgeleë plek en dit is etenstyd. Wat nou? Daar is nie ‘n inkopiesentrum naby nie. Die dissipels was verbaas toe Jesus vir hulle sê: “Gee julle vir hulle iets om te eet.” “Vyf brode en twee visse.” Dit is wat ons het. Dit is al, net dit. Niks meer nie.>>

Lees verder: Lydenstyd - dag 25

Tyd van verootmoediging en gebed - 9 Maart 2018
Jesus het sy dissipels aangekyk en gesê: “Geseënd is julle wat arm is, want aan julle behoort die koninkryk van God”. (Luk 6:20 – 1983 Vertaling)

Dit is God se bedoeling dat ons, sy kinders, geseënd sal wees. Hulle moet gelukkig wees. Die woord geseënd is om iets van louter vreugde, geluk en vrede uit te beeld, soos met die geboorte van ‘n kind.

Hierdie seën is gekoppel aan vreemde voorwaardes:
• Geseënd is julle wat arm is.
• Geseënd is julle wat honger ly.
• Geseënd is julle wat nou huil.
• Geseënd is julle wanneer mense julle haat en verstoot en uitskel.

Vreemde, dog waardevolle voorwaardes. Geseënd is kinders van die Here, die kerk, gemeentes wat nie sommer die status quo as vanselfsprekend aanvaar nie, wat leerbaar is, wat kritiese vrae kan vra oor die heersende kultuur en gebruike; wat bereid is om prys te gee en selfs honger te ly ter wille van ander en die koninkryk van God, wat nie omgee om verkleineer en verwerp te word omdat hulle gelowig is nie.

Dit is presies wat Jesus gedoen het. Ter wille van ons het Hy prysgegee, baie verloor, honger gely, gehuil en is Hy verwerp – selfs aan ‘n kruis vir ons gehang.

Gebed: Here dankie dat U ons seën en dat ons ter wille van U en u koninkryk mag prysgee, huil en selfs verstoot word. Amen

Stel jou ‘n gemeenskap voor waar mense jou sien soos Jesus jou sien; waar jy na ander kyk soos Jesus na hulle kyk.

Dit is één van die groot waardes wat die Here Jesus Christus ons kom leer het. Hy het ons geleer om met nuwe oë na mense te kyk; om in mense raak te sien wat Hy raaksien; om nie mense te definieer in terme van hul sondige gedrag nie, maar in terme van waarvoor hulle as beelddraers van God geskep is.

Wanneer Jesus na ‘n skuldige kyk, sien Hy hom/haar raak as sy kind wat oortree het; Hy sien hom/haar as ‘n mens vir wie God baie liefhet en hartseer is oor sy/haar oortreding; Hy sien raak waarvoor God hom/haar aanvanklik geskep het en bedoel het om te wees.

Die oomblik wanneer ons mense begin sien as een van ons of as een van hulle, vlieg genade by die deur uit.Om mense lief te hê, is om in iemand raak te sien waarvoor God hom/haar aanvanklik geskep het.

Leef ek met veroordelende of genadige oë?

 

Tekkiekerk het op Sondag 4 Maart, gaan besoek aflê by die oumas en oupas van Helderberg Village. Met groot opgewondenheid het die graad 4 – 6’e en hul groepleiers met Pneumatix se bussies vertrek. Hulle het die erediens by die Village bygewoon, saam gesing en spesiaal gemaakte kaartjies aan die oumas en oupas uitgedeel. Oom Eric Louw het vir ons jeug gebid en dit was vir oud en jong ‘n baie geseënde en spesiale besoek gewees.

Top