Wat doen jy as jy Sondag in die kerk sit en die dankoffersakkie beweeg al nader en jy weet jou tienerseun het gisteraand jou laaste note uit jou beursie geneem? Of sussie wil graag op ‘n kerkkamp gaan en die inskrywings sluit vandag en jy het nie jou beursie by jou nie? Die antwoord is SnapScan en jy het net jou selfoon daarvoor nodig.

So raak Helderberg Gemeente ook deel van die nuwe tegnologie. Meeste mense het deesdae hulle slimfone by hulle en dit kan maklik omskep word om 'n bydrae of donasie te maak. Jy laai die app af, volg die stappe om jou rekening te koppel en skandeer om 'n bydrae te maak. 

Klink maklik, maar presies hoe werk dit en is dit veilig? Kom ons verduidelik dit bietjie meer. Eerstens, moet jy ‘n slimfoon hê en dan laai jy net die app af deur na die spesifieke platform te gaan soos Apple Store, Google Play of Blackberry World. Of besoek www.GetSnapScan.co.za.

Hierna vul jy jou bankbesonderhede in en kies ‘n geheime PIN-nommer om jou kaartbesonderhede veilig te stoor op jou selfoon. Oor die veiligheid van die produk het meeste van ons baie vrae, gaan lees gerus die Frequently asked questions op die bogenoemde webblad, dit behoort jou gerus te stel (of kliek hier vir die skakel - http://www.snapscan.co.za/faq).

Wanneer jy ‘n bydrae of donasie wil maak, maak jy die SnapScan app oop, skandeer die kode van die instansie (Helderberg Gemeente sal outomaties opkom), bevestig die bedrag en keur die transaksie goed met jou PIN-nommer. Jy ontvang dan ‘n boodskap op jou selfoon om te bevestig die bydrae of donasie is deur. SnapScan gebruikers en instansies hoef nie aan ‘n spesifieke bank te behoort nie.

By Helderberg sal daar ses opsies wees waarvoor transaksies kan geskied:
• Dankoffer
• Geloofoffer
• Bankkollekte
• Versorgingsfonds
• Helderberg Uitreik Art 18A
• Kampe/kursusse

Die kerk sal dan 'n kennisgewing ontvang via SMS dat die bydrae gemaak is. Die persoon wat die inbetaling doen, kan ook op versoek anoniem bly in die kennisgewings wat die kerk ontvang, tensy jy jou naam spesifiek as deel van die verwysing gebruik, bv vir 'n kursus. 

Stuur asseblief ‘n epos aan Antoinette du Toit om die projek te spesifiseer vir Geloofoffer en Helderberg Uitreik Art18A inbetalings en ook by kamp en kursus inbetalings. 

Hierdie manier van bydrae en donasies gaan nie die ander betaalmetodes vervang nie, dis slegs nog ‘n opsie vir die gerief van lidmate. 

SnapScan is heeltemal gratis vir die gebruikers, jy moet net vir jou datakostes betaal, maar die app se grootte is minder as 10MB. Transaksies gebruik ook min data, omtrent dieselfde as wat ‘n enkele boodskap op Whatsapp kos. Helderberg Gemeente betaal ‘n transaksiekoste van 3% per transaksie. Die fooi word dadelik gehef en die balans van 97% word in die kerk se rekening inbetaal. Die kerk sal daagliks state van SnapScan ontvang wat elke transaksie reflekteer.

Hier is ‘n paar skakels wat meer inligting kan gee:
• SnapScan se webblad – www.getsnapscan.co.za 
• Vrae en antwoorde – http://www.snapscan.co.za/faq 
• Video – Só laai jy SnapScan op jou slimfoon http://youtu.be/hF5VnmlJ194
• Hoe om met SnapScan te betaal http://youtu.be/1e4xCcg5hTM

Top