By Familiebediening streef ons met die verskillende bedienings om vir ons kinders, jongmense en ouers ‘n veilige ruimte te skep vir deelname, bekering, uitreik na ander in nood en geestelike groei, om so die opdrag van dissipels maak te gehoorsaam. Ons bedienings vind plaas tydens die informele diens, behalwe die Tienerkerk, wat in die aand is. 

Pienkvoete (peuters 1 – 3 jaar) in Korinthe:
Die Pienkvoete lokaal is klankdig en kindervriendelik ingerig waar 1 – 3 jariges heerlik kan speel terwyl die ouers die diens op ‘n groot skerm kan volg. Daar is speelgoed, legkaarte, storieboekies en vele meer om kinders mee besig te hou.

Peuter- en kleuterkerk in Efese en Joppe:
Ons kleuters, 3 – 4 jaar en 5 – 6 jariges, word in aparte klassies bedien met God se Woord, hulle sing en doen aktiwiteite wat aansluit by die Bybelles. Daar word ook genoeg tyd ingeruim vir speel en 'n sappie te drink in die speelpark.

Kiddiekerk (graad 1 - 3)
Die Kiddiediens word in die Jeugsentrum gelei deur ons jeugwerker, Lizl Botha. Die kinders verdeel ná die diens in kleingroepe en gaan dan na verskillende lokale waar hulle op 'n meer persoonlike vlak gefasiliteer word deur groepleiers.

Tekkiekerk (graad 4 - 6)
Die graad 4 - 6 Tekkies het eers kleingroepe in verskillende lokale waar hulle gefasiliteer word deur groepleiers. Hulle ruil lokale met die Kiddiekerk en gaan dan na die Jeugsentrum waar ons jeugwerker, JC de Jongh, die Tekkiediens lei.

Tienerkerk (graad 7 – 12)
Ons Tienerkerk word saans om 18:00 gelei deur ons leraar Paul Barnard. Die jongmense verdeel om 19:00 tot 20:00 in dissipelskapgroepe wat deur ‘n graadfasiliteerder en groepleiers gefasiliteer word. Die jongmense is ook welkom om vanaf 17:30 in die Tent saam te kuier.

Al hierdie bedienings is afhanklik van die betrokkenheid van ons ouers, so kom gerus en meld aan.
Vir navrae kontak gerus vir Annette Botha

Top