Die Algemene Sinode van die NG Kerk vergader van 6-11 Oktober 2019 by die eMseni Konferensiesentrum in Benoni.

Die tema van die sinode is: “Maak ‘n lewegewende verskil”. As NG Kerk is ons daarop ingestel om die wil van die Here te soek binne die konteks waarin die Here ons
geplaas en geroep het.

Bid asseblief dat geloofsonderskeiding die hoogste op die agenda van die sinode sal wees.

Muntlegging tot viering van ons gemeente se 50’ste verjaarsdag
Oud en jonk word uitgenooi om op Sondag, 13 Oktober hul munte en note te kom uitpak op die groot 50 in die Tent. Dit is ‘n voorreg om deel te kan wees van ons gemeente se 50’ste verjaarsdag en om vir haar te sê: Veels geluk liewe Helderberg, mag die Here jou nog baie jare spaar.

Numeri 13:26-33 en 14:4-11, 39-44
Ons het verlede kwartaal met die hulp van die boek Eksodus gekyk na ons lewensreise. Hierdie kwartaal gaan ons fokus op die bestemming van hierdie reise: die beloofde land.

Ons kan nou al begin droom oor die toekoms wat God vir ons skep, al voel dit dikwels nog of ons in die woestyn is. Ons weet dat God eendag, wanneer alles tot ’n einde gekom het, ’n wonderlike toekoms vir ons gereed het. Die geheim is egter dit: ons hoef nie te wag vir eendag nie. God begin nou reeds die beloofde land vir ons ’n werklikheid maak.

Die probleem is dat baie mense nie eens meer kan droom nie. Die uitdagings en probleme van ons tyd veroorsaak dat ons eerder ingestel is op oorlewing. Die groot rede daarvoor is nie die grootte van die uitdagings en probleme van ons tyd nie. Dit is eerder dat ons nie vir God in berekening bring nie. Hier help die verhaal van die verspieders ons om ’n gesonde basis te kry om realistiese verwagtings te hê vir ons lewens.

As ons bly vashou aan die feit dat God met ons is, sal ons moed hê vir die plek waar ons onsself nóú reeds bevind. Dan sal moedeloosheid nooit die oorhand oor ons kry nie.

 

Ons benodig nog die volgende produkte vir die kerkkas stalletjies:
- Poedinghemel: poedingbydraes – enigiets is welkom, gebakte poeding, vla, jellie, roomys en sjokoladesous, ook bestandele. Kontak Anna Albertyn by 083 347 9648.
- Die Bakkery: Enige gebak is welkom – selfgemaak of gekoop. Koeke, terte, kolwyntjies, kleinkoekies, beskuit en dies meer. Dit is mos ‘n tradisie by enige basaar. Kontak Meagin van der Westhuizen by 071 354 0509
- Wit Olifante: Enige iets in jou huis waarvoor jy nie meer plek of nut het nie kan ‘n tuiste by iemand anders kry. Groot of klein items, enigiets kan gebruik word. Kontak Maatjie Botha by 082 619 9040 of gee sommer af hier by die kerkkantoor.
- Boekeparadys: Enige boeke veral storieboeke, CD’s, DVD’s, legkaarte of bordspeletjies is welkom. Kontak Annette Gerber by 082 545 7718

Jy kan dit asseblief afgee by die kerkkantoor duidelik gemerk vir watter stalletjie. Ons benodig ook mense wat by die stalletjies sal help Vrydagmiddag en -aand, asook Saterdag deur die dag.

Vir enige ander navrae kontak Corneille 

Sterkte aan al ons matrieks wat voorberei vir die eindeksamen. Ons dink aan julle en bid vir julle.

Top