Ons Here het opgestaan en Hy leef! In Petr 1:3-9 lees ons: Dit is ons hoop! Dit is ons waarborg vir die ewige lewe! Dit is ons motivering, ons dryf waarom ons hier en nou as Koninkryksmense in ’n krom en verdraaide wêreld wil leef. Natuurlik is daar beproewinge, soos die huidige pandemie wat onsekerheid, selfs vrees en angs, in ons lewens ingebring het.

Die opstanding van Christus maak dat ek ook met ander oë na die beproewinge kyk: Die egtheid van my geloof word getoets. Hoe werklik is die opgestane lewende Here vir my, vir jou, vir ons?

Baie dankie vir die wonderlike span wat maskers maak. Ons het gevra vir hulp en daar is soveel wat ingespring het. Op die stadium het ons reeds 919 maskers gemaak en dit word versprei na ouetehuise, Hospice, klinieke en hospitale. Indien jy ook wil help stik, kontak asseblief vir Louise.

Foto: 150 maskers is afgelaai by Helderberg Hospitaal. Dankie aan al die werkers wat help om die maskers te maak.

Sondag 12 April het ons Paasfees gevier. 40 Dae ná die opstanding het Jesus opgevaar, en die uitstorting van die Heilige Gees volg dan 10 dae daarna tydens die Fees van Weke (die Joodse Pinksterfees). Pinkster word dus gevier 50 dae ná Opstandingsondag. In hierdie seisoen van afwagting tot Pinkster besin ons opnuut oor die opstandingsgebeure deur 'n lens wat Eugene Peterson goed beskryf: “The Bible is not a script for a funeral service, but it is the record of God always bringing life where we expected to find death. Everywhere it is the story of resurrection.” Fontainebleau Gemeenskapskerk het 'n pragtige gebedsbegeleiding en kalender vir die 50 dae uitgewerk onder die tema: Blootgestel. Gaan jy dit saam met my doen? Kliek hier vir die kalender en kontak Hannes Theron (083-375-8443 of Hierdie e-posadres word van Spambotte beskerm. Jy moet JavaScript ontsper om dit te lees.) vir meer inligting.

Die grendelperiode het ons Bybelstudieprogram deurmekaar gekrap. Ons gaan voort om die Bybelstudiemateriaal op die webblad te plaas en vanaf Donderdag, 23 April, kan die wat wil van 09:00-09:30 op Zoom inskakel waartydens ons die materiaal sal bespreek. Studie 8-10 sal die week op die webblad geplaas word en volgende week tydens die Zoom-byeenkoms bespreek word. Geniet die reis saam met ons in Markus. Navrae kan gestuur word aan Hannes

Maskers, kospakkies, groente vir sopkombuise, etes vir haweloses en finansiële hulp aan individue en klein besighede wat hul inkomste kwyt is.

Dit is maar net ’n kort opsomming van die behoeftes waaraan die COVID-19-rampverligtingfonds sedert die begin van die inperking aandag gegee het. Die impak van COVID-19 is groot, maar Suid-Afrikaners se naasteliefde is groter.

Ons sien dit aan die groot bedrae geld en salarispersentasies wat mense aan noodlenigingsfondse beloof, maar ook in elke masker wat iemand stik, kospakkie wat iemand pak, of klein finansiële bydrae wat ’n persoon wat nog ’n salaris verdien maak om te verseker dat iemand anders nie honger en wanhopig gaan slaap nie.
Helderberg Uitreik se COVID-19-rampverligtingfonds kan ook getuig van wonderlike werk wat in die Helderberg-omgewing gedoen word. Fondse is tot dusver bewillig aan Seniorsorg vir maskers, handskoene en handontsmetmiddel, die Pêrel Projek vir kospakkies vir seisoenale plaaswerkers, en die projek vir Haweloses vir kospakkies en hulp met etes vir die haweloses wat tans in die nagskuiling se sorg is. Geld is ook beskikbaar gestel om groente by te dra vir sopkombuise in Sir Lowry’s Pass Village waar die nood groot is.>>

Lees verder: Covid-19-rampverligtingfonds: Hoe kan jy help?

Top