'n Passie vir God

en 'n hart vir mense en 'n wêreld in nood

Elke familie het hulle eie privaat WhatsApp-groep waar “inside” grappies gedeel word wat miskien nie vir die res van die familie snaaks is nie. Sien elke gesin het hulle eie manier van die doen. Voeg nou die agenda van blink liggies, geskenke, Kersfeesvader en twintig verskillende familie resepte om ’n skaapboud gaar te maak
daarby en alles met verhoogde emosies, dan het jy Kersfees.

Dit is daardie tyd van die jaar waar ons beplan om tyd te spandeer met familie wat ons lanklaas gesien het. Maar of jy nou by hulle gaan kuier en of hulle by jou gaan kom kuier, tyd saam met die familie kan gevul wees met baie seëninge en vreugde en tonne stres.

Hierdie komende Sondag gesels oor verhoudings in Kerstyd. Hoe navigeer ons in Jesus se rigting as almal om jou in ’n ander rigting trek? Kom gesels saam.

Groete,
Deon Els

Jy is kosbaar vir ons.

Goeie nuus is altyd welkom! Dit is jammer ons hoor nie genoeg daarvan nie. Dalk is dit omdat ons so bestook of oorval word met negatiewe stories en ervarings.
Die beste nuus wat hierdie wêreld ooit kon hoor, is die goeie nuus of evangelie van Jesus Christus. Johannes sê die mense moet hulle voorberei hiervoor. Sy boodskap in Markus 1 was “Bekeer julle” en maak die pad reg vir die Here.

Ons berei ons voor om oor 2 weke Jesus se koms te vier. Die boodskap is dieselfde: “Bekeer julle!“ Dit is ’n tyd vir omdraai en terug draai na Jesus. “Maak die pad reg!” Dit is ook ’n tyd om die dinge wat tussen jou en God staan, weg te vat, want God wil ons met sy Gees doop.

Kersfees 2023 kan vir jou ’n groot geestelike belewenis wees. Dit is goeie nuus!

Sien jou by Sondag se eredienste.

Danie Möller

Dit is lekker om met die gemeente te deel dat dit beter gaan! Ons maandelikse tekorte is minder. Dit stel ons in staat om meer te doen! As rentmeesters glo ons dat die volgende twee hoogtepunte van 2023 ‘n wesenlike rol gespeel het:
- Die basaar het verwagtinge oortref. Die deelname van baie mense het ons kollektiewe siele verkwik, maar ook die kerk se fondse versterk. Die basaar se sukses is die direkte gevolg van baie gemeentelede se harde werk en opdaag.
- Die onlangse erediensreeks oor “Dankbaarheid” is ook baie positief ontvang. Die terugvoer van gemeentelede was dat die reeks relevant en tydig was. Dit het ook ‘n merkbare verskil gemaak in dankoffers en maandelikse bydraes.

Die kerk is finansieel deur ‘n moeilike tyd, sedert COVID. Dalende bydraes, het ons finansies onder baie druk gesit. Soos by baie gesinne en besighede, was die afgelope jare “tough”. Die gevolg was tekorte op die kerk se jaarlikse begrotings. Dit het ons genoodsaak om ons reserwes aan te wend ten einde ons gemeente se opdrag van God te bly uitvoer: “Leef met ‘n passie vir God en ŉ hart vir mense en ‘n wêreld in nood”.>>

Lees verder: Terugvoer vanaf die Rentmeesterspan