Nee, ongelukkig nie vir die land nie – net vir die kerk. Danksy ‘n weldoener behoort die gemeente binnekort ‘n sonkragstelsel te installeer wat die vrolike gedreun van die kragopwekker op Sondae die stilswye behoort op te lê.

Groete
Chris Eagar

Twitter

Ons familie het die afgelope vakansie ‘n spesiale aand gehad waar ons na ou familie foto’s gekyk het. Dit was nogal baie goed om herinner te word aan die pad wat die Here met ons familie gestap het. Die ou foto’s het my gehelp om talle dinge wat ek vergeet het, weer te onthou. Dit is waaroor hierdie Sondag se eredienste gaan “Ons onthou…..”. Die Christelike geloof is ‘n “onthou geloof” en die Bybel is juis geskryf om ons te help onthou wie God is en die pad wat Hy met sy kinders gestap het.
In Josua 4:1-14 lees ons van die volk wat deur die Jordaan getrek het en hoe hulle ‘n gedenkteken van klippe opgerig het sodat hulle nooit hierdie gebeure kan vergeet nie. Wat moes hulle onthou? Vers 24 sê: “sodat al die volke van die aarde mag weet dat die hand van die Here sterk is, en sodat julle altyd vir die Here julle God ontsag mag hê.”

Wat onthou jy van God? Wat wil jy hê moet jou kinders en kleinkinders van God onthou? Wat wil jy hê moet ander mense van jou onthou?
Ons is besig met ons nuwe reeks “7 weke wat geloof laat groei” en Sondag 28 Januarie is die eerste boodskap van die reeks. Kry Sondag ‘n boekie by die kerk as jy nog nie een het nie of laai dit elektronies af (sien webblad).

Kom Sondag sodat ons mekaar kan help onthou!

Danie O’Kennedy

Twitter

Hierdie week nooi ons jou uit na 'n paar van ons groepe. Dalk is daar een waarvan jy hou en voel dis jou plek. Hier is 'n paar idees:

Daar is Bybelstudie-groepe wat elke week bymekaar kom. As jy wil inskakel by ‘n groep kontak vir Ina van Niekerk by 082 578 9893 (dames) of Johann Swart by 082 928 7596 (mans). Die groepe kom 10:00 op Donderdae by die kerk bymekaar.

As jy aan die einde van 'n besige week op soek is na vars en goeie geselskap om jou reg te kry vir die naweek, is die Manne Bediening op Vrydagoggend koffie en beskuit “Check-In” net vir jou bedoel. Kom bou jou vriendekring en ondersteunings netwerk. Kom luister net of kom gesels saam - almal welkom. Kontak is Jaco by 083 675 5687 of Leon by 081 019 0710
Sien jou Vrydagoggend, 06:00 in die Kapel!

Wil jy weet waaroor omgeegroepe gaan of dalk deel wil word van ‘n groep? Kom vind gerus meer uit hieroor en vul sommer jou voorkeurvorm in deur die QR-kode (regs) te gebruik of kliek op hierdie skakel: https://forms.gle/6BPqJM6GksNunKrZ6

Twitter

Hierdie span se rol is om die droom van God vir Helderberg Gemeente uit te leef tov die finansies van die Gemeente. Dié span staan onder leiding van Chris Eagar en almal in die span is baie bekwaam en passievol vir die bydrae wat hulle kan lewer.

Wil jy met hulle gesels? Kontak gerus vir Chris Eagar by Hierdie e-posadres word van Spambotte beskerm. Jy moet JavaScript ontsper om dit te lees.

Twitter

Hierdie jaar het nou behoorlik afgeskop. Party was gedwing om terug werk toe te gaan en ander kon nie wag om weer by die werk uit te kom nie. Ouers het gehuil terwyl klein kindertjies vir die eerste keer by die kleuterskool, laerskool, hoërskool en universiteit afgegee is. Kinders bly maar altyd klein in ons harte. Ander het weer gesug van verligting toe ons hulle kon oorgee vir die arme onderwysers. Oral borrel die energie van afwagting vir die jaar, maar ter selfde tyd is ons diep hartseer oor die twee tieners in ons gemeenskap wat oorlede is. Ons dink en bid vir die familie en vriende van Jean Conradie en Daniël Jordaan wat in ‘n frats ongeluk oorlede is. Ons besef ook dat ons tieners iewers iets van God se liefde in hierdie situasie moet beleef. Moedig hulle aan om Sondag die eerste tienerdiens van die jaar by te woon.

Ons as leraars en kerkraad glo dat God met ons as gemeente besig is en dat daar ‘n roeping op elke een van ons is. Dat God vir ons deel maak van hierdie geloofsgemeenskap juis sodat ons hierdie roeping kan uitleef saam met ander gelowiges in die teenwoordigheid van God. In die begin van hierdie jaar gaan ons kyk na Jona 3 en Efesiërs 3. Twee gedeeltes wat praat van God se planne vir ons en die manier hoe ons daarvan kan deel word. Moenie hierdie geleentheid mis nie.

Sien jou Sondag
Paul Barnard

Twitter