Welkom terug aan almal wat die wintervakansie rondgeloop het. Hierdie Sondag skop ons die kwartaal af wat in die winter begin en in die lente eindig! Al die aktiwiteite kom weer aan die gang en ons sien daarna uit om jou by die kerk te sien.

Een van die lekker dinge van die lewe is ‘n taai Wilsons-toffie. Maar hy is nie dadelik lekker nie. Jy moet eers ‘n manier vind om hom sagter te kry. Daar is in ons lewens ook baie sulke taai toffies. Lekker dinge, maar dit vra eers bietjie werk van my. Ons gaan in die preke van hierdie kwartaal op ‘n paar praktiese taai toffies van ons lewe fokus, en hopelik die lekkerte van elkeen weer ontdek.

Sondag is die vraag hoe ons in vandag se taai-toffie-tye toekomsgerig en met hoop kan lewe.

Die sleutelteks is Klaagliedere 3:21-24
Dit roep ek in herinnering, daarom het ek hoop:
Die troue liefde van die HERE vergaan nie, want sy ontferming ken geen einde nie.
Dit is elke oggend weer nuut – groot is u getrouheid.
My erfdeel is die HERE, sê ek; daarom hoop ek op Hom.

Sien jou Sondag
Danie Möller