'n Passie vir God

Jesus bring hoop

Liewe lidmaat van Helderberg
Ons ken van droogte en swaarkry in ons land en die woorde van Jesaja 35:1 is al dikwels in die verlede aangehaal: “Laat die woestyn en die dor land hulle verheug, laat die Araba juig en blom soos ‘n tulp.” (2020-vertaling). Covid-19 en die uitdagings daarmee saam, het ons in 2020 dikwels laat voel soos reisigers in ‘n woestyn en dor land. Kersfees wil ons herinner dat God ons raaksien op hierdie reis. Jesus het juis aarde toe gekom vir ‘n stukkende en onseker wêreld. Jesus is nie net die Verlosser van die wêreld nie. Hy is ook die Immanuel, God met ons. “Sy sal geboorte gee aan ‘n seun, en jy moet hom Jesus noem, want Hy sal sy volk van hulle sondes verlos. Dit het alles gebeur sodat wat die Here deur die profeet gesê het, vervul kon word: Kyk die maagd sal swanger word en ‘n seun in die wêreld bring en hulle sal hom Immanuel noem, wat as dit vertaal word beteken ‘God met ons.’” (Matt 1:21-23; 2020-vertaling).

Jesus is Immanuel (God met ons) in ‘n stukkende en onseker wêreld (Matt 1:23). Elke jaar met Kersfees is dit weer blomtyd in die woestyn, omdat Jesus ook na my en jou kom. Ons is elke jaar van voor af bly, omdat Hy vir ons wat vasval en magteloos kan voel oor die uitdagings om ons, nuwe lewe en nuwe krag gee. Dit is ook hoekom ons opgewonde kan raak oor Kersfees. Dis nie maar net ‘n mooi droom te midde van ‘n nagmerrie nie. Dis ‘n viering van God se groot genade en van hoop.>>

Op hierdie pad wat vir ons ook soms soos 'n woestyn kan voel, gee Hy vir ons aan mekaar as reisgenote, om mekaar op te help en aan te spoor. Dankie dat ons ook reisgenote by Helderberg Gemeente kan wees. Ons wil graag vir jou en jou familie ‘n geseënde Kerstyd toewens. Mag die Here julle seën met ’n somerkersfees vol vrede, vreugde en dankbaarheid.

Ons sien saam uit na 2021. Helderberg is ‘n gemeente van hoop, en die afgelope Sondag (13 Des) is dit weer bevestig met 23 jongmense wat belydenis van geloof afgelê het. Ons families en kinders is ‘n sterk groeipunt in ons gemeente. En juis daarom het ons ook ‘n nuwe jong leraar beroep wat ons hiermee kan help. Deur die baie uitreikprojekte kon ons hoop bring in ons gemeenskap en verder. Ons kon lidmate wat swaarkry versorg, al kon ons nie altyd fisies by hulle wees nie. Ons kon Jesus aanbid op kreatiewe maniere by die kerk en by ons huise. Ons weet nie hoe 2021 gaan lyk nie, maar ons weet dat Jesus as Immanuel met ons sal wees. Ons sien uit daarna om in 2021 weer ‘n gasvrye tuiste te wees vir gelowiges en soekendes. Mag ons saam in 2021 geïnspireer word deur God se drome vir ons en vir ons gemeenskap.

Geseënde Christusfees!

Danie (x2) en Paul