All you need is love...

So lui die lirieke van die bekende 1976 Beatles-liedjie. Enige ouer weet egter dat babas nie net liefde nodig het nie. Hulle het ook melk en doeke nodig. Dieselfde waarheid geld vir die talle babas wat in tydelike veilige sorg wag op aanneming. Die kanga&roo-projek ondersteun tydelike-veilige-sorgouers (kanga-ouers) wat omsien na babas wat vir aanneming beskikbaar gemaak is.

Die periode van tydelike veilige sorg is gewoonlik ’n minimum van 60 dae en kan tot so lank as 6-8 maande duur. Die kanga&roo-projek werk nou saam met NorSA, ‘n Designated Child Protection Organisation, en PROCARE (maatskaplike werkorganisasie wat o.a. in aannemings spesialiseer). Die projek poog om ten minste een maal per maand vir die ongeveer 18 babas wat via NorSA in tydelike veilige sorg in die Helderbergkom, Boland, Overberg en Noordelike voorstede versorg word, ‘n blik formulemelk en pak weggooidoeke te voorsien. Sedert die afskop van die projek in Mei 2016, het ons 259 pakke weggooidoek, 172 blikke formulemelk en 33 pakkies baby wipes uitgedeel.

God se hartklop
Die versorging van hierdie babas is God se hartklop. Psalm 68:6 en 7 beskryf God as: “’n Vader vir weeskinders en ’n beskermer vir die reg van weduwees (is God in sy heilige woning). God laat eensames in ’n huisgesin woon.....” Die liefde en aandag wat die babas in tydelik versorging ontvang is onontbeerlik vir hulle ontwikkeling en vir hulle aanpassing in hulle nuwe huisgesinne wanneer hulle aangeneem word.

Die staat gee ’n klein toelaag vir die diens wat die kanga-gesinne lewer. Dit is egter hoegenaamd nie voldoende nie. Weggooidoeke en babaformule alleen kos ongeveer R1 000 per maand per baba. Agv die groot behoefte neem sommige gesinne baie maal twee of drie en soms tot ses babas in, wat ondersteuning vanuit ’n ander bron as binne die gesin self baie noodsaaklik maak.>>

Lees verder: Getuienisgeleentheid van kanga&roo

Een van die groot vrae waarmee kerke vandag oor die hele wêreld worstel, is die vraag: Hoe help ons mekaar om nie die klem op lidmaatskap nie, maar dissipelskap te plaas? Die Here stuur ons nie na die kerk toe nie, maar eerder na ons werk- en woonplek om daar Sy dissipels te wees. Die Here roep ons nie om goeie lidmate te wees nie, maar om oral Sy dissipels te wees. Die rol van die kerk as geloofsgemeenskap is om mekaar daarvoor toe te rus.

As ek twee eredienste per maand bywoon, beteken dit dat ek ongeveer 5-6 uur pm of 60-72 uur per jaar by die kerk is – dit is ongeveer 1% van my tyd. Net om billik te wees, is daar natuurlik ook diegene wat by ander bedieninge van die kerk betrokke is. As ek 10-15 uur pm betrokke is by ander aktiwiteite is dit ongeveer 2% van my tyd. Dit beteken dat ek ongeveer 97% van my tyd óf by die werkplek, óf by my woonplek, óf elders deurbring. Die groot vraag is, is ek dáár dissipel van die Here Jesus Christus of gaan dit vir my dáár net oor my koninkryk, my wil, my naam en my beeld na buite.

Indien ons ons dissipelskap beperk tot slegs spesifieke godsdienstige en kerklike tye, sal ons die meeste van ons leeftyd leef in die krag en mag van ons eie naam en nie in dié van Jesus Christus die Here nie. Die Here Jesus het ons leer bid: “Laat u koninkryk kom, laat u wil geskied, laat u Naam geheilig word”. Daarom is dissipelskap oral waar ek is en beweeg belangrik. Hiermee moet ons mekaar help.

Dit is wat ons in die komende week wil doen na aanleiding van Matt 5:43-48, asook Matt 11:28-30. Ons tema vir die week is: Leer doen wat Jesus sê.

Musiekkoördineerder - Helderberg Gemeente
Daar is ’n vakature vir ’n musiekkoördineerder wat verantwoordelikheid sal neem vir die vestiging, ontwikkeling, en skedulering van informele begeleidingsgroepe in die gemeente. Dit behels ook liturgiese vaardighede om die vloei van informele dienste in die gemeente te beplan in samewerking met ander verantwoordelike persone. Musikale kennis en –vaardigheid, sowel as rekenaarvaardigheid word vereis.

Aansoekers kan per epos die volledige pligtestaat en salarisskaal aanvra by Corneille Barnard by Hierdie e-posadres word van Spambotte beskerm. Jy moet JavaScript ontsper om dit te lees.. Aansoeke sluit op 17 April 2017.

Daar is ook 'n vakature beskikbaar by Argief van Stellenbosch, kliek hier vir meer.

Woensdag 29 Maart 2017 om 18:3 by Helderberg Gemeente is daar 'n kunsuitstalling ter fondsinsameling vir Stop'it!, 'n Uitreikprojek wat aktief gekant is teen alle vorms van mensehandel. Hul werk nou saam met die STOP-organisasie (Stop Trafficking of People).
Kaartjies @ R50 pp te koop by die kerkkantoor.
Tema: LIG/duisternis- God se liefde en skoonheid seëvier oor die aaklige dade van die duisternis
Navrae: Isabel Vroon
Aangehegte foto is 'n skildery van Ohna Mouton Marais met die titel "Arise".

Die wete dat die Here Jesus Here is en hier is, maak dat ons alle rede het om ten spyte van lewensomstandighede, ook uiters negatiewe omstandig-hede, beter eerder as bitter mense te wees. Jesus sê: “Ek is die weg en die waarheid en die lewe” (Johannes 14:6). “I am the Road, also the Truth, also the Life” (The Message).

Die grootste tragedie van die lewe is nie dat mense doodgaan nie, maar dat iets in hulle doodgaan terwyl hulle nog lewe. Die hartseer is dat ons in ons samelewing met baie mense wat lewensmoeg is, gekonfronteer word. Hulle haal nog asem, doen wat hulle moet doen, staan op en gaan slaap, maar daar is eintlik nie meer ʼn teken van lewe nie.

Jesus nooi ons om in Hom te lewe en ʼn perspektief op die lewe te kry wat ʼn hemelse ervaring word, al woed die storms om my. Dit is God se wil dat ons die hemel sal ontdek voordat ons doodgaan, nie eers wanneer ons doodgaan nie.

Die uitnodiging van Jesus is vir jou bedoel: “Kom na My toe almal wat vermoeid en swaar belas is, en Ek sal julle rus gee. Neem My juk op julle en leer van My, omdat Ek sagmoedig en nederig van hart is, en julle sal rus vind vir julle gemoed. Want my juk is draaglik en my las is lig.”

ʼn Dissipel van Jesus leer om saam met Jesus te leef en vanuit hierdie saam-met-Jesus-leef die lewe te ontdek en net te leef.

“I am learning from Jesus how to lead my life, my whole life, my real life” – dit is Dallas Willard se getuienis. Is dit ook jou getuienis?

Ons teks vir die komende week om meer van Jesus te leer, is: Kol 3:5-7, 10, 12-14, 17-4:1

Top