Uyavula lees– en skryfprojek (Uyavula:”Jy maak oop”)
Uyavula wil die liefde van Jesus na kinders bring deur boeke, stories en geletterdheid.

Hoe kan jy help?
- By twee leesklubs, Maandag- of Vrydagmiddag
- Voorlees van stories aan leerders tydens skoolure (1 x per week vir 30 minute)
- Saterdagskool 1 x per maand
- Skenking van netjiese kinderboeke, boekrakke en skryfbehoeftes
- Donasies vir nuwe kinderboeke en drukwerk van readers vir die begin/"sukkel"-lesers

Ons het 800 kinders bereik met die hulp van 25 vrywilligers in 2016. Hartlike dankie vir jou ondersteuning, voorbidding, skenkings en hulp.

Kontak asseblief vir Amanda de Villiers, 072 874 0147, Hierdie e-posadres word van Spambotte beskerm. Jy moet JavaScript ontsper om dit te lees. of besoek ons Facebook-blad: The Uyavula Reading and Writing Project

“… die waarde van stories om morele waardes te illustreer kan kwalik oorskat word. By kinders sal dit nie net taalvermoë en algemene kennis uitbrei nie, maar ook hul verbeelding stimuleer.” - Piet Naudé

Dit was op 7 Januarie oom John en tannie Izabel Trengove se 68'ste huweliksherdenking. Oom John Trengove is ons oudste lidmaat en het die geleentheid saam met hul kinders gevier.

Baie geluk oom John en tannie Izabel.

Waarom is ek ‘n Uyavula voorleser vir skoolkinders?
Daar is soveel voordele vir die kinders. Deur vir kinders voor te lees, help jy hulle om lees te assosieer met positiewe en aangename ondervindings - en so word ‘n liefde vir lees gekweek. Hul taal- en luistervaardighede word ontwikkel en hul woordeskat en algemene kennis word terselfdertyd uitgebrei. Hulle word aan ‘n verskeidenheid skryfstyle blootgestel en ontdek watter skrywers en skryfstyle hulle van hou.

Deur saam met hulle oor die karakters, agtergrond en uitkoms van die storie te gesels, word hulle gelei om dit ook in verband met hul eie lewens te bring. Morele, sosiale en geestelike waardes kan so aangespreek en vasgelê word. Voorlees stimuleer die verbeelding en motiveer die kind om self te lees.

Maar voorlees hou nie net vir die kinders voordele in nie. Ek het ‘n Uyavula voorleser geword met die gedagte dat ek vir die kinders iets gaan beteken en was aangenaam verras om te ontdek hoeveel dit vir myself beteken. Die leerders se borrelende entoesiasme laat my uitsien na die leessessies. Dis ‘n wonderlike geleentheid om my eie liefde vir boeke met kinders te deel. Dit is vir my vervullend en sinvol. Dis ‘n voorreg. En dis boonop pret!

Maritha le Roux

Alle ouers en jongmense vanaf graad 7 – 11 word uitgenooi om komende Sondag, 15 Januarie om 18:00 die Tienerkerk in die kerk by te woon. Daarna van 19:00 – 20:00 gaan die verskillende grade na die volgende lokale vir hul dissipelskapgroepe:

  Fasiliteerder Lokaal
Graad 7 JC de Jongh Joppe
Graad 8 Hannes Theron Korinte
Graad 9 Herman Labuschagne    Patmos
Graad 10 Breda Ludik Efese
Graad 11      Paul Barnard Jeugsentrum

Hier is ook die belangrike datums vir die eerste kwartaal:

15 Januarie 18:00 - 20:00: Afskop van die Tienerkerk en dissipelskapgroepe
22 Januarie – 12 Maart: Tienerkerk & dissipelskapgroepe
18 – 20 Maart: #IMAGINE
26 Maart: Tienerkerk en kwartaalafsluiting
30 Maart – 18 April: skoolvakansie

Enige navrae kan gerig word aan JC de Jongh

Dit is vir ons ‘n voorreg om saam met julle, jul kosbare kind(ers) geestelik te versorg. Ons neem Jesus se uitnodiging in Lukas 18:16 ernstig op: Maar Jesus het die kindertjies nader geroep en gesê: “Laat die kindertjies na My toe kom en moet hulle nie verhinder nie, want die koninkryk van God is juis vir mense soos hulle”.

Ons beplan vir die kinders interessante aktiwiteite en voorsien meestal lesmateriaal, skryfbehoeftes, hulpmiddels en temaversierings (ook met Pinkster) gratis. ‘n Bydrae van R70 per kind per jaar sal ons help om ons beperkte begroting te laat klop. Dié gelde is betaalbaar by die kerkkantoor of die volgende twee Sondae by die inskrywingstafels in die Jeugsentrum.

Maak asseblief oor die volgende twee weke seker by die inskrywingstafels of jou kind se naam op die lys is en of jul kontakbesonderhede nog korrek is. Nuwe intrekkers is welkom om te kom inskryf.

Graad 1 – 6 kinders kom in die Jeugsentrum bymekaar.
Kleuters 3 – 6 jaar kom by die Kleuterkerk bymekaar en inskrywings word in Patmos gedoen.

Die jaarprogramme vir al die groepe is beskikbaar op die webblad onder “Bedieninge” en dan onder “Familiebediening” is die verskillende groepe.
Navrae: Annette Botha

Top