Ons kan soms nogal lekker kla – kla oor die lewensonkoste, oor die droogte, oor siekte, oor die regering en oor dienslewering. Sommige mense, wanneer jy hulle groet, is hul eerste reaksie: Niks te kla nie, dit gaan goed. Dan, so na 10 minute begin die klagtes.

Mag ons kla? Moet ons skuldig voel as ons kla. Kla is dan so lekker.

Daar is iets soos gelowig kla en ongelowig kla.

Die volk het in die woestyn die slegte gewoonte gehad om ongelowig te kla. Hulle het soms net gekla ter wille van kla en ondankbaar gewees.

Die Bybel is vol voorbeelde van mense wat pyn en wanhoop voor God se voete gaan neersit in geloof. Daar is ’n uitrukking wat lui: Dis Gods geklaag; dit is net te erg. Ek kan niks anders daarmee doen as om voor God daarmee te gaan staan nie.
Hier kan ons leer kla met die wete dat Jesus hier by my is, en dat Hy reeds aan die werk is om my by te staan.

Om te bid “Hoe lank nog?” is eerlikheid voor die Here, gemeng met sekerheid dat Hy dit nie vir altyd sal laat aangaan nie.

Kla, maar kla gelowig.

21 - 28 Mei 2017

It’s Time dat ons as gemeente saam met die groter Helderberg gaan deelneem aan die landswye, gebedsinisiatief van 7 Days on the Wall.

Omgeegroepe, bidgroepe, gesinne en individue word uitgenooi om hul plek op die gebedsmuur in te neem waar ons vir 24/7 gaan bid vir:
- Geestelike ontwaking van die kerk (Jesaja 62:6,7),
- Redding van die ongeredde (Handelinge 15:16) en
- Sosiale geregtigheid (Lukas 18:7,8).

Kontak Annette Botha as jy vir ‘n spesifieke uur op die gebedsmuur wil inneem.
Die Kapel sal Maandag, 22 Mei tot Vrydag 26 Mei om 11:00 – 12:00 oop wees.

Vrydagaand 5 Mei, sal my altyd bybly as die aand wat ek Jesus se teenwoordigheid duidelik gevoel het in Langstraat, Kaapstad.

Op ‘n Uitreik saam met Helderberg Uitreik se Stop’it! projek en Straatwerk in die middestad, verdeel ons (Helderbergers) in groepies saam met spanlede van Straatwerk en ek beland in die groepie wat in Langstraat werk.

Die opdrag is eenvoudig: Loop twee-twee, knoop ‘n gesprek aan met ‘n prostituut, deel Jesus se liefde en bid vir hulle.

Hulle staan op die hoeke en wag vir kliënte wat met taxis aankom, oë heeltyd besig om besigheidsgeleenthede te soek. Hulle is mooi versorg, uitlokkend aangetrek en lyk angstig. Gewillig om te gesels, maar het nie baie tyd nie. Sommige kom selfs aangestap en vra vir gebed. Hulle stories klink eenders. Paar kinders wat by deur Ouma versorg word, die lewe is hard en geld is min. Hierdie is 'n uitweg. Almal soek ‘n beter lewe. Dis gevaarlik ja. Die kamers is net daarbo in die gebou op die hoek waar ons gesels. Die kliënte stroom in. Die seer lê vlak en die gebedsversoeke is volop. Die keuse is moeilik. Die pimp staan en kyk.

Daar is ‘n uitweg. Straatwerk bied Hoop. Hulle word uitgenooi om kontak te maak. Toe ons moet teruggaan om middernag is daar nog te veel gebedsversoeke en ons maak ‘n kringetjie met vyf dames. Ons bid Jesus se liefde, vrede, verlossing, vergifnis en heling vir ons almal se sonde, pyn en seer. Almal wil ‘n drukkie hê.

God was hier teenwoordig.

Louise Theron

Op die foto is die Helderberggroep saam met Straatwerk.

Ons is lief vir die Here en ons is lief vir musiek.

Met al die ondersteuning wat ons Klassieke Klanke Konserte van ons gemeente en die Helderbergkom-gemeenskap ontvang het, is die uitdaging gegee om te kyk hoe ons hierdie geleentheid kan uitbrei. Dit is duidelik dat Helderbergkom hulle klassieke musiek geniet en die idee het toe ontstaan om ons jaarlikse konsert in ‘n konsertreeks te omskep.
Natuurlik niks te uitspattig nie.

Die konsertreeks, wat uit drie klassieke konserte bestaan, skop af met
Klassieke Kitaar Klanke
Sondag, 21 Mei (15:00)

Die tweede ‘n Klassieke Orrel Klanke
Sondag, 6 Augustus (15:00)

en laastens ons tradisionele Klassieke Klanke Konsert (koor en orkes)
Sondag, 15 Oktober (15:00)

Alle konserte is by Helderberg Gemeente en toegang is gratis (donasies is welkom). Kom kuier daarna verder in die Tent waar eet- en drinkgoed te koop sal wees.

Merk sommer nou al hierdie datums in jou dagboek en kom ondersteun asseblief hierdie inisiatief en die musici van ons pragtige land.

8 Mei - Wat kom eerste?
Skrifgedeelte:
Ps. 51:4 - U luister na my stem in die môre, Here, in die môre terwyl ek voor U verskyn en op U wag.
Markus 1:35 - Die môre vroeg, toe dit nog nag was, het Hy opgestaan en buitentoe gegaan na 'n eensame plek en daar gebid.

Dwarsdeur die eeue was die vroeë oggend gewild by gelowiges as ‘n tyd om met God te praat en na God te luister. Dit is gewoonlik dan stil. Die dag se rumoer het nog nie begin nie en ‘n gesprek met God vroeg in die more bepaal op ‘n manier die toon van die hele dag.
Dit is ‘n goeie manier om ons koppe reg te kry vir die dag wat voor ons lê.
Praktiese nadenke:
• As jy dit nie reeds doen nie, wat sal jou help om van ‘n vroeë gesprek met God ‘n gewoonte te maak?
Aand:
• Watter effek het jou vroeë gesprek vanoggend – of die feit dat jy dit NIE ingepas het nie – op jou hele dag gehad?
• Wat wil jy spesifiek oor hierdie saak bid?>>

Lees verder: Week 3 - Opstanding: Meer as net WOORDE

Top