22 Mei - Die waarheid is nooit "klein" nie
Skrifgedeelte:
Job 27:4-5 - "... solank as wat die asem van God in my is, sal ek niks sê wat verkeerd is nie en sal daar geen onwaarheid uit my mond kom nie."

'n Algemene verskynsel in ons tyd, is om die waarheid so bietjie te "rek." Ons noem dit "bietjie aandik" of "die feite verdraai" of "sake in 'n beter lig stel".
Ons ken almal wit leuens of "nood waarheid." Dis wanneer jy nie heeltemal die waarheid praat nie, maar dis darem met 'n goeie bedoeling of dit kry jou uit die moeilikheid.
As al ons verskonings uitgeput is, dan bly dit NIE die waarheid praat nie.
Job herinner ons daaraan dat die asem waarmee ons klanke maak wanneer ons praat, eintlik die asem van God is. Dit is dan mos onmoontlik dat daar enige iets behalwe die waarheid uit ons monde sal kom!
Praktiese nadenke:
• As jy aan die dag dink wat voorlê, kan jy aan situasies dink waarin jy sal moet oppas dat jy niks behalwe die waarheid uit jou mond laat kom nie?
Aand:
• Hoe het dit vandag gegaan met die woorde wat deur God se asem uit jou mond gekom het?
• As jy aan vandag dink, wat wil jy nou bid?>>

Lees verder: Week 5 - Opstanding: Meer as net WOORDE

Wat ʼn voorreg om in ʼn land te kan leef waar elkeen die reg het op vryheid van gewete, godsdiens, denke, oortuiging en mening (Art 15.1 – Die Grondwet). Ons kan met vrymoedigheid bely waarin ons glo, die evangelie verkondig en die Here dien. Daar is miljoene gelowiges oor die wêreld wat nie daardie vryheid geniet nie.

Tog stoei gelowiges met die uitdaging: Aan die eenkant wil ons inklusief, oop en ontvanklik wees vir almal en ander respekteer vir dit wat hulle glo; aan die anderkant wil ons ook graag die evangelie met hulle deel. Beteken dit om vir iemand anders ruimte te gee dat ek nie die vrymoedigheid mag neem om met hom/haar oor die evangelie te praat nie? Wat beteken dit om in ons tyd met dapperheid te bely waarin ons glo en die waardes wat die Here vir ons leer met vrymoedigheid uit te leef sonder om veroordelend en arrogant te wees?

Ons dink vandag saam hieroor en die Woord gee vir ons so ʼn pragtige voorbeeld in Handelinge 4:18-31.

Ons wil jou graag nooi om die Vlugteling-uitreik na Griekeland te ondersteun. Die Helder-mammas samel babaklere, kombersies en opvoedkundige speelgoed in vir die vlugtelinge.

Handig asseblief bydraes by die kerkkantoor in, duidelik gemerk Vlugteling-uitreik. Ons sal dit waardeer as jy op die pakkie kan aandui of dit seuns-/meisie-klere is en watter ouderdom dit voor geskik is. Kombersies kan van fleece of wol wees (75x100cm).

Jy is welkom om kontantbydraes ook te maak en kan dit inbetaal in die Uitreikrekening gemerk: Kort uitreik-babadoeke.

Opvoedkundige speelgoed:  Ons is opsoek na klein legkaarte, geheuspel kaartjies, ryg-aktiwiteite en ander opvoedkundige speelgoed wat maklik verpak.

Vir verdere navrae kontak gerus vir Annette Gerber by 082 545 7718 of Hierdie e-posadres word van Spambotte beskerm. Jy moet JavaScript ontsper om dit te lees.

Moenie dit misloop nie.

Op Hemelvaart dag, Donderdag, 25 Mei 2017, vier Helderberg Gemeente fees en ons het meer as genoeg rede om fees te vier. Ons vier eintlik op Hemelvaart die teenwoordigheid van die Here Jesus Christus – Hy is Here en Hy is hier!

Ons vier dit met twee geleenthede om 11:00 en 19:00 wat deur Herman Breytenbach gelei word met ʼn monoloog opvoering van die evangelie van Matteus en Johannes. Herman is nie net ’n deeglike kenner van die Bybel nie, maar ook ’n merkwaardige storieverteller. Herman sal van sy boeke te koop aanbied. Daar sal ook ʼn ete in die tent wees en donasies daarvoor sal waardeer word. Kom vier met vrymoedigheid die evangelie saam met ons.

Kom kuier lekker saam na die oggenddiens met ietsie te ete. Die aand is die eetgoed vooraf vanaf 18:00 beskikbaar.

 

 

Top