Een van die groot uitdagings waarmee ons as gelowiges baie in dié tyd gekonfronteer word, is dat ons in die Here Jesus glo, Hom aangeneem het, glo dat Hy ons liefhet, maar nie altyd besef wat dit is om sáám met Hom te leef nie. Eintlik is dit waaroor dissipelskap en Christenskap gaan: Om met Hom te leef. In Kol 2:2 verwoord Paulus dit so mooi: “Aangesien julle dus Christus Jesus aangeneem het, bly in Hom leef; in Hom is julle gewortel en in Hom word julle opgebou en versterk in die geloof, soos julle onderrig is, terwyl julle oorvloedige dankbaarheid betoon.” Die Amplified vertaling lui: “Therefore as you have received Christ Jesus the Lord, walk in [union with] Him [reflecting His character in the things you do and say - living lives that lead others away from sin], having been deeply rooted [in Him] and now being continually built up in Him and [becoming increasingly more] established in your faith, just as you were taught, and overflowing in it with gratitude.”

Christenskap wat nie erns maak met dissipelskap nie, word Christenskap sonder Christus. Die hart van dissipelskap is om saam met Jesus te leer leef, om Hom te volg en om Hom te leer ken.

Jesus nooi ons uit om by Hom aan te sluit op ons pad deur die lewe. Dit behels ’n verhouding, wat ons moet voed en wat moet groei. Dit vra ook dapperheid, omdat Jesus nie altyd die maklike pad kies nie; Hy neem my soms saam na plekke waar ek nie vanself sou kies om te wees nie, maar ek volg Hom daarheen, omdat dit my betrokke maak by dinge waarvoor Hy ’n diep passie het.

Volgende week is ons tema: Leer hoe om te lewe en die teks vir die week is Matteus 11:28-30.

Onthou die Sondag se preke oor die reeks is op ʼn Maandagmiddag op die webblad beskikbaar.

Ons junior jeug word aangemoedig om Sondae hul Bybels saam te bring na die Kiddie- en Tekkiekerk. Die Bybel 1983-vertaling is teen ‘n spesiale prys van R120,00 by die kerkkantoor beskikbaar.  Bestellings kan deurgestuur word aan Hierdie e-posadres word van Spambotte beskerm. Jy moet JavaScript ontsper om dit te lees. met bewys van betaling (EFT-betaling aan Helderberg Gemeente met verwysing: Jeug Bybel + naam).

Vrydagaand, 3 Maart het die gemeente heerlik saam gekuier ten spyte van dreigende reënwolke. Die vure het van vroeg af al gebrand vir die wat ‘n vleisie op die kole wou gooi. Hannes Theron het ook verskeie lekker potte aan die prut gehad, vir die wat net sommer wou saamkuier.

Die beesstert pot was soos gewoonlik ‘n groot wenner, asook die pap en sous. André Westraat en sy groep het ongeveer 150 roosterkoeke gebraai en gesorg dat niemand met leë hande huis toe gaan nie. So ‘n geleentheid vra dus dat ‘n hele klomp mense betrokke is en agter die skerms werk, vanaf Sonja en Anja wat almal vriendelik ontvang het, almal wat bakke poeding aangedra het, die groente wat van vroeg af al voorberei is tot die werkers wat die volgende dag moes kom opruim.

Dis so lekker om ‘n geleentheid te reël waar die gemeente kan saamkuier en mekaar beter leer ken. As jy deel van die span wil raak, kontak gerus vir Corneille by die kerkkantoor, dan maak ons die volgende kuiergeleentheid nog ‘n groter sukses. En as jy hierdie kuier vir een of ander rede misgeloop het, moenie die volgende gemeentekuier mis nie. Hou die Helderstem dop en sit dit betyds op jou kalender.

Kliek hier vir die foto's of gaan kyk op ons Facebookblad.

Op Maandagaand 13 Maart 2017 om 18:30 in die Uitreiklokaal by Helderberg Gemeente, vertel Marina Olivier meer oor haar en haar man André se Frontida bediening in Sisaket, Thailand. Net 0.12% van die (1 480 432) bevolking in Sisaket is Christene. Thailand is wêreldwyd bekend as die “pinnacle” van Buddhisme. Meer as 94% van die land se inwoners is Buddhiste.

Kom luister hoe hulle die Goeie Nuus indra in skole, universiteite en selfs SA gevangenis in die tronke in Bangkok. 

Almal welkom.

Navrae: Louise Theron

Uitdaging: Die behuising ontwikkelings aan die westekant van Somerset-Wes gaan binne die volgende 5 jaar meer as 10 000 nuwe inwoners huisves. Daar is egter nie enige kerkstrukture hier beskikbaar gestel nie.
 
Visie: Om draers van Christus se hoop in hierdie gemeenskap te wees deur die vestiging van ‘n nuwe geloofsgemeenskap. Dit is ons droom dat dit ‘n eiesoortige geloofsgemeenskap sal wees wat groei en waar mense ‘n gasvrye tuiste kan vind waar hulle met vrymoedigheid God kan aanbid.

Uitvoering: Curro Sitari skoolsaal bied ‘n plek vir byeenkomste en groter aanbiddingsgeleenthede. Loodsbyeenkomste is aan die einde van 2016 aangebied. Weeklikse Sondagbyeenkomste vind vanaf 22 Januarie 2017 plaas met besoekergetalle wat wissel tussen 30 en 120. Kinders en tieners word doelgerig deel gemaak van die bediening. ‘n Gasspreker tree een maal per maand op en een maal per kwartaal word ‘n gemeente-ete met nagmaal aangebied. Verskillende kleingroepe vergader weekliks in die woonbuurte.>>

Lees verder: Getuienisgeleentheid van Hoop Geloofsgemeenskap

Top