Helderberg Uitreikbestuur het op 4 November hulle jaarlikse strategiese-sessie gehou.

Gerig uit Joh 21:15 – 19 soos opgeteken in die Bybel vir Almal, het die boodskap duidelik deurgekom in Jesus se opdrag aan Petrus: As jy my liefhet…
- Moet jy my skape laat wei
- Jy moet ‘n herder wees vir my mense
- Jy moet sorg vir my mense
- Kom saam met my!

Met hierdie oproep om saam met Jesus te gaan, waar Hy ookal lei, het die span hulle strategiese denke gerig en gebid vir die projekte (bedieninge) volgens hulle spesifieke behoeftes.

Strategiese riglyne en planne vir die komende jaar is opgestel. Die bestuur is opgewonde om te sien waarnatoe Jesus Helderberg Uitreik en die lidmate van Helderberg Gemeente en Somerset-Wes Moedergemeente wil saamneem. Ons is reg om saam te gaan!

Op die foto is voor Stephany Baard en Leone Malan, middel is Danie Möller en Louise Theron, agter is Emil Krugmann, Chris Hollenbach en Kotzé van Wyk

 

 

Wil sommer iets lekkers met julle deel God wat besig is om ʼn legkaart te bou – ʼn legkaart met Jesus se gesig.

Ek was vandag laatmiddag op ʼn vlug met Safair na Johannesburg, my eerste vlug met Safair. Wanneer ek vlieg, is dit een van my “stilhoutye” waartydens ek wil lees, sommer net sit en dink, musiek luister of lekker slaap. Dan kies ek gewoonlik doelbewus vir my ʼn sitplek teen die venster of paadjie en doen nogal moeite om nie oogkontak te maak of enige geselsies aan te knoop nie. Dit is my “Hannes-tyd” en ek geniet elke oomblik daarvan.

Gister en vanoggend was baie besig en ek het net nie die tyd gehad om na my sitplekbespreking te kyk en dit vooraf te verander nie. So beland ek tussen twee swart jongmans – Thapelo, ʼn 20-jarige, aan my linkerkant teen die venster en Bongani, ʼn 30-jarige, aan my regterkant.

Toe die vliegtuig net so wil begin beweeg, sê Thapelo baie benoud: Ek het so ʼn hol kol op my maag; ek voel naar; dit is die eerste keer dat ek vlieg; ek is bang. Ek sê vir myself: “Hier kom groot sports!” Ek kry sommer ʼn so ʼn ongemaklike gevoel dat die wit hemp wat Louise met soveel liefde, net voor ek by die huis weg is, gestryk het, teen die einde van die vlug anders gaan lyk. Ek probeer hom kalmeer en vertel wat die doel van die papiersakkie voor hom is.

Bongani, wat deel is van die afrigtingspan vir die vroue Springbokrugby en baie vlieg, help ook om hom te kalmeer. Ek en Bongani het mekaar eers leer ken en Bongani sê vir Thapelo: Jy is so gelukkig om langs ʼn dominee te sit; hy sal jou help om kalm te bly. So begin ons drie gesels en lekker kuier onder andere om vir Thapelo kalm te hou. Thapelo vertel ons sy storie hoe daar probleme was met sy geboorte en sy familie vir hom gebid het, daarom is hy Thapelo gedoop; dit is die woord vir “gebed” in Sotho.>>

Lees verder: Legkaart op 'n vliegtuig

'n Ope brief aan al die lidmate van Helderberg Gemeente, kliek hier.

 

Gasvryheid is deel van ons gemeente se kultuur en waardes. Daarom het ons die afgelope Sondag as deel van ons Tema: Met wie sit ek om die vuur ‘n paar Helderberg houtlepels uitgedeel.

Die idee is dat die gemeentelede wat dit ontvang het iemand uitnooi vir ‘n kuier, ete of sommer net ‘n koppie koffie sodat ons tyd saam met mekaar kan spandeer en mekaar beter leer ken. Daarna gee jy dan weer die lepel vir die volgende persoon sodat dit deur die gemeente kan rondkuier.

Ons wil ook graag foto’s en stories van die kuiers hoor – stuur dit gerus na ons Faceboek-blad: Helderberg Gemeente Gesels Lekker.

Gasvryheid is deel van ons lewe, omdat die Here vir ons belangrik is. Kom ons help om die gasvryheidskultuur in Helderberg te help bou.

Helderberg Uitreik se Sir Lowry’s Pass-Projek se passie, energie en fondse word hoofsaaklik op die kinders van Sir Lowry’s Pass (SLP) gefokus. Ons glo dat die opvoeding van kinders, as die volwassenes van die toekoms, die sleutel tot langtermyn armoede uitwissing en beter lewenstandaarde is.

Gevolglik fokus ons op die volgende:
Sir Lowry’s Pass Village kindervoedingsprogram

Daar word tans dmv hierdie program, genoeg hawermout, suiker, sout, gas, ens. aan Sir Lowry’s Pass Primêre skool gelewer om vir 500 kinders elke oggend ontbyt te gee. Ons lewer ook kos, bestandele en gas aan Kingdom Kids crèche, Fiela Opperman en Babsie Steyn wat elke dag aan voorskoolse kinders kos gee. Laastens verskaf die projek ook bestanddele vir middagetes tydens sommige skoolvakansies, wanneer die Nasionale voedingskema nie aktief is nie. Hierdie program maak ‘n direkte bydrae tot die voeding van die kinders en hul fisiese vermoë om ontvanklik vir opleidingsgeleenthede te wees. Volgens die skoolhoof het skoolbywoning- en slaagsyfers sedert die aanvang van hierdie program in Junie 2010 baie verbeter. Vir verdere inligting, skakel asseblief vir Sarita Groenewald by 082 557 5551.>>

Lees verder: Storie van hoop - Sir Lowry’s Pass-Projek

Top