Wintertyd in die Kaap maak die lewe stadiger. Ons leef meer na binne en saam met die natuur is dit op baie maniere ‘n stiller tyd. Dit is die ideale tyd vir dieper verhoudings met mekaar en met God. Die kitskultuur waaraan ons gewoond raak, beïnvloed ons hele lewe, ook ons verhouding met God.
Eie aan ons tydsgees, wil ons hê ons geloofspad moet ook sommer gou en kits en maklik wees – maar dan mis ons die wonderlike diepte en diversiteit en lekker van ‘n groeipad saam met God. Iets wat die moeite werd is neem tyd. Maak tyd vir God – loop die pad saam met medegelowiges – ontdek die unieke pad wat God met jou en julle loop.
Maak tyd vir jou afspraak met God by Sondag se eredienste. Sien jou graag by die kerk of skakel in by ons uitsaaidienste. Warm bly.